სასკოლო განათლება უნდა დაეხმაროს მოსწავლეს ქყვეყნის ინტერესების, ტრადიციებისა და ღირებულებების მიმართ საკუთარი პასუხისმგებლობის გააზრებაში. სწორედ ესაა ზოგადი განათლების ერთ-ერთი უპირველესი მიზანი. მიზანი მიღწეულად მიიჩნევა, როცა მოსწავლეს გამოუმუშავდება უნარი სწორად განსაზღვროს საკუთარი ქვეყნის სახელმწიფოებრივი, კულტურული, ეკონომიკური და პოლიტიკური ინტერესები. თბილისის 214-ე საჯარო სკოლის VIII-IX კლასის მოსწავლეებმა ქართული ენისა და ლიტერატურის მასწავლებელთან ერთად განახორციელეს პროექტი სახელწოდებით ,,ჩემი ქვეყნის არჩევანი'', რომელიც სწორედ ამ დიდი მიზნის განხორციელებაში შეტანილი წვლილი იქნება.
პროექტი წარმოადგენს კლასგარეშე აქტივობას და დაიგეგმა ქართული ენისა და ლიტერატურის ერთ-ერთი თემატური ერთეულის (,,ისტორიის გზაგასაყარზე'') დამუშავებისას.
შევეცადეთ, პროექტის ფარგლებში დაგეგმილი საქმიანობის შინაარსი დაგვეკავრშირებინა საქართველოს სახელმწიფო ენის მასწავლებელთა ასოციაციის მიერ გამოცხადებულ ,,ბლოგების კონკურსის'' თემატიკასთან. ჩვენ ავირჩიეთ საკონკურსო თემა - ომი და მშვიდობა. ბლოგი შექმნილია სპეციალურად ბლოგების კონკურსისათვის!
ჩვენ მიერ განხორციელებული პროექტი, რომლის ფარგლებშიც შეიქმნა ბლოგი, ემსახურება ზოგადი განათლების შემდეგი მიზნის განხორციელებასაც: ,,მოზარდს უნდა შეეძლოს არა მხოლოდ ინფორმაციის მოპოვება, არამედ მისი შეფასებაც შინაარსის, დანიშნულებისა და ხარისხის მიხედვით, დასახული მიზნებისათვის მისი გამოყენების ფორმების განსაზღვრა; ტექნოლოგიური მიღწევების ეფექტიანი გამოყენება’’ .
ზემოთქმულიდან გამომდინარე, ბლოგი, ერთი მხრივ, სასწავლო პროექტის განხორციელების ინსტრუმენტია, ხოლო, მეორე მხრივ, საფუძველი კონკურსში ჩვენი სკოლის მონაწილებისათვის.
ირმა გრიგალაშვილი,
სსიპ თბილისის 214-ე საჯარო სკოლის ქართული ენისა და ლიტერატურის მასწავლებელი
